FHN: Bu il suda boğulmaq təhlükəsi ilə üzləşən 65 nəfər xilas edilib
Bu ilin ötən dövrü ərzində Fövqəladə Hallar Nazirliyinin (FHN) Kiçikhəcmli Gəmilərə Nəzarət və Sularda Xilasetmə Dövlət Xidmətinin xilasediciləri tərəfindən suda boğulmaq təhlükəsi ilə üzləşən 65 nəfər xilas edilib.
Xeberhub.com xəbər verir ki, FHN-dən verilən məlumata görə, xilas edilən şəxslərdən 59-u çimərlik mövsümü ərzində olub.
Bildirilib ki, xidmətin nəzarət etdiyi ərazilərdə ölümlə nəticələnən sudabatma hadisəsi qeydə alınmayıb. Eyni zamanda, 50 nəfərin meyiti sudan çıxarılaraq aidiyyəti üzrə təhvil verilib.
FHN-in məlumatına əsasən, suda boğulma hadisələrinin başlıca səbəbləri arasında qeyri-çimərlik ərazilərdən istifadə, küləkli havada dənizə girmək, spirtli içki qəbul etdikdən sonra suya daxil olmaq və uşaqların nəzarətsiz buraxılması yer alır.
Xüsusilə bölgələrdə çay, göl, suvarma kanalı və çimmək üçün nəzərdə tutulmayan digər su hövzələrindən istifadə də təhlükəli halların yaranmasına səbəb olur.
FHN əhaliyə, xüsusilə valideynlərə müraciət edərək yalnız xilasedicilərin xidmət apardığı çimərliklərdən istifadə etməyə çağırıb.
Nazirlik bildirir ki, xilasedicilərin göstərişlərinə və çimərliklərdə quraşdırılmış xəbərdaredici və maarifləndirici lövhələrin tələblərinə ciddi şəkildə əməl edilməlidir.
Qeyri-çimərlik ərazilərdə çimmək, üzmə sərhədlərini keçmək, küləkli havada dənizə girmək, spirtli içki qəbul etdikdən sonra suya daxil olmaq, suda təhlükəli və kobud hərəkətlər etmək, gecə saatlarında çimmək və fırtına xəbərdarlığından sonra çimərlikdə qalmaq qadağandır.
Bundan başqa, çimərlik ərazisinin zibillənməsi, ev heyvanlarının gətirilməsi, balıq tutulması, xilasetmə texnikası istisna olmaqla qayıq və digər kiçik gəmilərin çimərlik ərazisinə daxil olması da yolverilməzdir.
FHN uşaqların yalnız böyüklərin nəzarəti altında çimərlikdən istifadə etməsinin vacibliyini vurğulayıb. Uşaqlar onlar üçün ayrılmış ərazilərdə çimməli və heç bir halda nəzarətsiz buraxılmamalıdır.
Nazirlik həmçinin günün ən isti saatlarında uzun müddət günəş altında qalmağın və hava qaraldıqdan sonra suya girməyin təhlükəli olduğunu xatırladıb.
Qeyd olunub ki, çimərliklərdə istirahət üçün daha təhlükəsiz vaxt 09:00-dan 20:00-dək olan müddətdir.
