Kurdistan24 telekanalının məlumatına görə, Ərbil üzərində hava hücumundan müdafiə sistemləri beş kamikadze tipli pilotsuz uçuş aparatını məhv edib. Hadisə zamanı şəhərdə güclü partlayış səsləri eşidilib.
Husilər Səudiyyə Ərəbistanına məxsus iki neft tankerinə hücum etdiklərini bəyan ediblər. Təşkilat hücumun PUA və raketlərlə həyata keçirildiyini iddia edir. UKMTO isə tankerlərdən birinin zərbə aldığını və gəmidə yanğın baş verdiyini təsdiqləyib.
ABŞ Prezidenti Donald Tramp İranla münaqişədə həlak olan dörd amerikalı hərbçinin nəşinin vətənə gətirilməsi mərasimində iştirak edib. ABŞ mediası qarşıdurma başlayandan bəri həlak olan hərbçilərin sayının 18-ə yüksəldiyini bildirib.
İranın xarici işlər naziri Abbas Əraqçi ABŞ Prezidenti Donald Trampın son bəyanatına cavab olaraq bildirib ki, İrana qarşı istənilən təcavüz sərt və qəti cavabla qarşılanacaq. O, hücumda iştirak edən bütün tərəflərin legitim hədəf sayılacağını vurğulayıb.
İran parlamentinin sədri Məhəmməd Baqir Qalibaf bildirib ki, əgər Tehran neft ixrac edə bilməsə, regionda digər ölkələrin də neft satışı mümkün olmayacaq. O, həmçinin Hörmüz boğazında təhlükəsizliyin ABŞ qüvvələri bölgədən çıxacağı halda təmin ediləcəyini vurğulayıb.
İran Silahlı Qüvvələrinin nümayəndəsi Əbülfəzl Şekarçi bildirib ki, ABŞ inkişaf etmiş kəşfiyyat imkanlarına baxmayaraq, İranın bəzi raket istehsalı obyektlərinin yerini müəyyən edə bilmir. Onun sözlərinə görə, raket və PUA istehsalı ölkədə fasiləsiz şəkildə davam edir.
Azərbaycan və Slovakiya təhlükəsizlik sahəsində əməkdaşlığı gücləndirmək istiqamətində mühüm addım atıblar. Bakıda keçirilən görüşün yekununda tərəflər məxfi məlumatların mübadiləsi və qarşılıqlı mühafizəsini nəzərdə tutan sazişi imzalayıblar.
Rusiya Müdafiə Nazirliyi Xarkov vilayətinin Artelnoye və Zaporojye vilayətinin Blaqovatnoye yaşayış məntəqələrinin nəzarətə götürüldüyünü açıqlayıb. Məlumat Ukrayna tərəfindən təsdiqlənməyib.
Prezident İlham Əliyev Medianın İnkişafı Agentliyi və Beynəlxalq Münasibətlərin Təhlili Mərkəzinin yenidən təşkili ilə bağlı fərman imzalayıb. Eyni zamanda, yeni yaradılan Beynəlxalq Münasibətlərin Təhlili və Multikulturalizm Mərkəzinin Nizamnaməsi təsdiqlənib, müəllimlərin geyim qaydaları ilə bağlı yeni səlahiyyət bölgüsü müəyyənləşdirilib.
İran parlamentinin Milli Təhlükəsizlik Komitəsinin üzvü Həsən Qaşqavi Donald Trampın İranın danışıqlar istədiyi barədə açıqlamasını təkzib edib. O bildirib ki, bu cür bəyanatlar yalnız neft qiymətlərinə təsir göstərmək məqsədi daşıyır.
Ukrayna Prezidenti Volodimir Zelenski general-mayor İqor Skibyuku Silahlı Qüvvələrin Baş Qərargah rəisi təyin edib. O, əvvəllər Baş Qərargah rəisinin müavini olub və zəngin döyüş təcrübəsinə malikdir.
Azərbaycan–Almaniya Biznes Şurasının yaradılması iki ölkə arasında iqtisadi və strateji əməkdaşlığın inkişafı üçün yeni imkanlar açır. Şura investisiyaların təşviqi, biznes əlaqələrinin genişlənməsi və innovasiya sahəsində əməkdaşlığın gücləndirilməsinə xidmət edəcək.