"Qarabağ"ın futbolçusu Kadi Borges UEFA Konfrans Liqasında Azərbaycan klublarının ən yaxşı bombardiri olub.
XeberHub.com xəbər verir ki, Oxu.Az-ın Peşəkar Futbol Liqasına istinadən yaydığı məlumata görə, braziliyalı yarımmüdafiəçi turnirdə 6-cı qolunu vuraraq bu göstəriciyə nail olub.
Kadi Borges UEFA Konfrans Liqasının pley-off mərhələsində "Tvente" ilə Niderlandda keçirilən qarşılaşmada (1:0) "Qarabağ"a qələbə qazandıran qola imza atıb.
Bununla da 30 yaşlı futbolçunun "Qarabağ"ın heyətində UEFA Konfrans Liqasında keçirdiyi 17 matçda vurduğu qolların sayı 6-ya çatıb.
Borges əvvəlki 5 qolunu 2021/2022 mövsümündə vurub. Həmin vaxt o, III təsnifat mərhələsində Kiprin "AEL" klubuna, pley-offda Şotlandiyanın "Aberdin" komandasına, qrup mərhələsində Kiprin "Omoniya" klubuna 2, pley-offda isə Fransanın "Marsel" komandasına 1 qol vurub.
Bundan əvvəl Azərbaycan klublarının UEFA Konfrans Liqasındakı ən yaxşı bombardiri adına üç futbolçu şərik idi. Kadi Borgesdən başqa "Sabah"ın futbolçusu Coy-Lens Mikels və "Qəbələ" və "Zirə"nin heyətində çıxış etmiş Rafael Utziq turnirdə 5 qol vurmuşdular.
Qeyd edək ki, Kadi Borges "Qarabağ"ın heyətində avrokuboklarda ümumilikdə 11-ci qolunu vurub.
