Məhəmməd Salahın kökləri ilə bağlı maraqlı iddia: Əcdadları Trabzondan olub?
“Trabzonspor”un heyətinə yeni qatılan dünya şöhrətli futbolçu Məhəmməd Salahın ailə kökləri ilə bağlı maraqlı iddia gündəmə gəlib.
Xeberhub.com xəbər verir ki, aparılan araşdırmaya əsasən, misirli futbolçunun əcdadlarının Türkiyənin Trabzon vilayətinin Dərnəkpazarı bölgəsi ilə bağlı olduğu irəli sürülüb.
İddianı araşdıran Amasya Universitetinin müəllimi Əli Qalib Yücəl Salahın nəslinin təxminən altı nəsil əvvəl Osmanlı dövründə yaşamış və “Ekşioğlu” ləqəbi ilə tanınan Əli Paşaya qədər uzandığını bildirib.
Araşdırmaya görə, Ekşioğulları ailəsinin müxtəlif qolları zaman ərzində Trabzonla yanaşı Rize və Orduya, eləcə də Misirə qədər yayılıb. Salahın ailəsinin də bu nəslin Misirə köçən qollarından biri ilə əlaqəli ola biləcəyi iddia olunur.
Yücəl qeyd edib ki, Dərnəkpazarı və Ekşiali bölgəsi ilə Ekşioğlu ailəsi arasındakı tarixi əlaqələrə dair müxtəlif akademik mənbələrdə də məlumatlara rast gəlinir.
Bununla belə, Salahın Trabzon kökənli olması ilə bağlı bu məlumatın iddia və araşdırma xarakterli olduğu, futbolçunun özünün və ya ailəsinin bu barədə rəsmi açıqlama vermədiyi bildirilir.
Qeyd edək ki, Məhəmməd Salah 2026-cı ilin avqustunda “Trabzonspor”a transfer olunub və Türkiyə klubunda ikiillik müqavilə imzalayıb.
