Müctəba Xameneidən qonşu ölkələrə çağırış: ABŞ bazaları bağlanmalıdır
Xeberhub.com xəbər verir ki, İranın ali rəhbəri Müctəba Xamenei ölkənin qonşu dövlətlərini ABŞ-nin regiondakı hərbi mövcudluğuna münasibətdə mövqelərini açıq şəkildə ifadə etməyə çağırıb.
Oxu.Az “Azad İran” Telegram kanalına istinadən bildirir ki, Xamenei İranın 15 ölkə ilə quru və ya dəniz sərhədinin olduğunu və Tehran üçün bu dövlətlərlə “isti və konstruktiv münasibətlərin” qorunmasının vacib olduğunu deyib.
İranın ali rəhbərinin sözlərinə görə, bəzi qonşu ölkələr uzun illər ərzində öz ərazilərində ABŞ-nin hərbi və maliyyə bazalarının fəaliyyət göstərməsinə şərait yaradıb. O iddia edib ki, həmin bazalar Vaşinqtonun Yaxın Şərqdə təsir imkanlarını genişləndirməsinə xidmət edir.
Xamenei qonşu dövlətlərə müraciət edərək onları İrana qarşı hərəkətlərə münasibətdə mövqelərini dəqiq müəyyənləşdirməyə çağırıb.
“Bu ölkələr sevimli vətənimizə qarşı təcavüzkarlara və vətəndaşlarımızın qatillərinə münasibətdə mövqelərini aydın şəkildə müəyyən etməlidirlər”, – deyə o bildirib.
Müctəba Xamenei həmçinin ABŞ-nin “təhlükəsizlik” və “sülh” ifadələrindən istifadə etməklə regiondakı əsas məqsədlərini gizlətdiyini iddia edib.
İranın ali rəhbəri qonşu ölkələrdə yerləşən ABŞ hərbi bazalarının bağlanmasına çağırış edib.
