Sumqayıtın Koroğlu prospektində avtomobil təmiri sexi və ehtiyat hissələri mağazasında yanğın baş verib. Alov 60 kvadratmetr sahəni əhatə edib, xəsarət alan olmayıb.
İmişlidə “Mercedes-Benz” və “BMW” markalı avtomobillərin toqquşması nəticəsində iki sərnişin xəsarət alıb. Faktla bağlı araşdırma başlanılıb.
“Porsche”nin yeni tam elektrikli “Cayenne Electric” model xətti Azərbaycanda təqdim edilib. Təqdim olunan “Cayenne Turbo Electric” versiyası 1 156 at gücünədək gücə və 0-dan 100 km/saatadək 2,5 saniyəlik sürətlənmə göstəricisinə malikdir.
Ermənistanın Baş naziri Nikol Paşinyan Azərbaycan Prezidenti İlham Əliyevə telefonla zəng edib. Tərəflər Vaşinqton Sülh Sammitinin ildönümünü, sülh prosesində əldə olunan irəliləyişi, iqtisadi-ticari əlaqələri və TRIPP marşrutunun icrasını müzakirə ediblər.
Rusiyanın Samara vilayətində sənaye müəssisəsi PUA hücumuna məruz qalıb. Krasnodar diyarında PUA qalıqlarının düşməsi nəticəsində İlski neft emalı zavodunda yanğın baş verib və beş nəfər xəsarət alıb. Tula vilayətində isə yeddi PUA-nın məhv edildiyi açıqlanıb.
Milli Məclisin deputatı Arzuxan Əlizadə 8 avqust 2025-ci ildə Vaşinqtonda keçirilən Azərbaycan, Ermənistan və ABŞ liderlərinin görüşünü Cənubi Qafqazın siyasi tarixində mühüm hadisə kimi qiymətləndirib. O, sülh sazişinin razılaşdırılmış mətninin paraflanmasını və Birgə Bəyannamənin imzalanmasını xüsusi qeyd edib.
